| പരസ്പരം സ്നേഹിക്കുകയെന്നതൊഴികേ നിങ്ങള്‍ക്ക് ആരോടും ഒരു കടപ്പാടുമുണ്ടാകരുത്. എന്തെന്നാല്‍, അയല്ക്കാരനെ സ്നേഹിക്കുന്നവന്‍ നിയമം പൂര്‍ത്തീകരിച്ചുകഴിഞ്ഞു. കാരണം, വ്യഭിചാരം ചെയ്യരുത്, കൊല്ലരുത്, മോഷ്ടിക്കരുത്, മോഹിക്കരുത് എന്നിവയും മറ്റേതു കല്പനയും ഈ ഒറ്റവാക്യത്തില്‍ സംഗ്രഹിച്ചിരിക്കുന്നു: നിന്നെപ്പോലെ നിന്‍റെ അയല്ക്കാരനെ സ്നേഹിക്കുക. സ്നേഹം അയല്ക്കാരന് ഒരു തിന്മയും ചെയ്യുന്നില്ല. അതുകൊണ്ട് നിയമത്തിന്‍റെ പൂര്‍ത്തീകരണം സ്നേഹമാണ്. ഈ സമയം തിരിച്ചറിയുക. നിങ്ങള്‍ നിദ്രയില്‍നിന്ന് ഉണരേണ്ട മണിക്കൂറാണിത്. കാരണം, ഇപ്പോള്‍ നമ്മുടെ രക്ഷ നാം വിശ്വാസം സ്വീ കരിച്ച സമയത്തെക്കാള്‍ സമീപസ്ഥമാണ്. രാത്രി കഴിയാറായി; പകല്‍ സമീപിച്ചിരിക്കുന്നു. ആകയാല്‍, നമുക്ക് അന്ധകാരത്തിന്‍റെ പ്രവൃത്തികള്‍ പരിത്യജിച്ച് പ്രകാശത്തിന്‍റെ ആയുധങ്ങള്‍ ധരിക്കാം. പകലെന്നപോ ലെ നമുക്കു മാന്യമായി വ്യാപരി ക്കാം. സുഖലോലുപതയിലോ മദ്യലഹരിയിലോ അവിഹിതവേഴ്ചകളിലോ വിഷയാസക്തിയിലോ കലഹത്തിലോ അസൂയയിലോ മുഴുകരുത്. പ്രത്യുത, കര്‍ത്താവായ ഈശോമിശി ഹായെ ധരിക്കുവിന്‍. ദുര്‍മോഹങ്ങള്‍ ഉണ്ടാകത്തക്കവിധം ശരീരത്തി ന്‍റെ കാര്യത്തില്‍ ശ്രദ്ധിക്കാതിരിക്കുവിന്‍. |
| സഖറിയാ ദൂതനോടു ചോദിച്ചു: ഞാന്‍ ഇത് എങ്ങനെ അറിയും? ഞാന്‍ വൃദ്ധനാണ്; എന്‍റെ ഭാര്യ പ്രായം കവിഞ്ഞവളുമാണ്. ദൂതന്‍ അവനോടു മറുപടി പറഞ്ഞു: ഞാന്‍ ദൈവസന്നിധിയില്‍ നില്ക്കുന്ന ഗബ്രിയേലാണ്. നിന്നോടു സംസാരിക്കാനും ഈ സദ്വാര്‍ത്ത നിന്നെ അറിയിക്കാനും ഞാന്‍ അയയ്ക്കപ്പെട്ടിരിക്കുന്നു. ഇതാ, ഇവ സംഭവിക്കുന്ന ദിവസം വരെ നീ നിശ്ശബ്ദനും സംസാരിക്കാന്‍ കഴിവില്ലാത്തവനുമായിരിക്കും. എന്തെന്നാല്‍, യഥാകാലം പൂര്‍ത്തിയാകാനിരിക്കുന്ന എന്‍റെ വാക്കുകള്‍ നീ വിശ്വസിച്ചില്ല. |
Syro Malabar Commission for Liturgy